MNF General Secretary chuan "ZPM hian an thupui pakhatah 'Ram rorelnaa Pathian ram tun din' tih neiin 'Kan ṭha bik tur a ni a, kan danglam bik tur a ni' tiin thil ṭha tih tum tam tak an zuar a nih kha. Tunah an sorkar chuan thla 8 hmel a lo hmu ve ta a, an intiamna te ti hlawhtling tur chuan hun ala reilo deuh bawk nen mipuiin an la ngaichang rih a; chutihrualin 'Kan ti ve lo ang' an tihte an tih ve leh tho si avang hian anmahni vote tu mi tam tak an hnual ṭan mek a ni," a ti.

"Nasa taka MNF sorkar sum puk sawisel ṭhin khan an han sorkar ve a, a puk uar uarah an ṭang a; Restricted tender sawisel ṭhin khan restricted tender lem leh Departmental work lem an uar chho hle tih chu mipui tî tî a ni. Chutihlaiin Aizawl khawpui chhung kawng chhiat ber hun kan tawng mek a ni," a ti bawk.

Aizawl South III MLA hlui chuan, "Kalphungthar an sawi làr  hle laiin an kal dan erawh danglamna hmuh tur a vang hle a, an Budget pharh hmasak berah opposition an nih laia an lo sawisel ṭhin ang tho an pass a, an kal danah sorkar inrenchem lam an hawi lo a ni. Tin, mipui sorkar din a, Unit system tibo tura insawi ṭhin khan Silpauline tak ngial pawh unit kaltlanga dil a ngai leh si" a ti. 

Mizoram University-a zirtirtu chuan, "ZPM sorkar hi an han kal rei deuh anga, mi tamtak duhthu sam anga ram hruai harsatzia an hmu chho in a rinawm; chutihrualin kan ram hruaitu hluite ṭhatna tam tak mipuiin an hmuh thiam phah ngeiin ka ring" a ti bawk.

Prof. Mawitea chuan "Thangtharte khawvelah hian ram hruaitu leh party ten thil ṭha in tihhmuh ila, thangthar mithiam leh ṭha ten politics hi luhna tlaka an ngaihna turin political party te pawhin kalphung dik leh ṭha zawka kal kan intihsiak chhoh zel a pawimawh hle," a ti a.

"MNF party pawh kan intuaithar mek a; kan sorkar hun hman liam takah khan tih fuh tawk loh kan nei ang tih kan ring; dik leh ṭha zawka Mizoram hruai leh turin inpekna thar nen Pathian râwn chunga kan kal phawt chuan zoram mipui support kan hlawh chho leh ngei ang tih ka ring tlat a ni" a ti bawk.